In magsuysuy sin jaman limabay hambuuk makapatumtum katu’ bahawa in kabuhi sin manusia aun jangkaan niya. Mataud kiyalabayan ha kabuhi ini in patut hinangun pangadjian hi bin ha huling bata’. In manga panghati kiyadihil sin tuhan labay daing ha pagiskul nakadihil pamikil iban huna-huna’ maluag. Nakadihil da isab panali’ sin mangi’ marayaw. Daing na katu’ bang unu in panigan ha duwa ini; mangi’ atawa marayaw?
Magsarang-sukul pa Tuhan in kabuhi yari pa ha sangunan sin jasad ini, dirihilan pa kusug iban kasay magsuysuy. In ummul biyus sin tuhan subay usalun ha karayawan, sambat da bang kita hisiyu bihaun nagsabab sin hisiyu kita nakauna.
Hangkan kagunahan tuud in mangadji iban pagiskul ha jaman bihaun. Agi sin junjungan Rasul, Nabi Muhammad Bin Abdullah (saw), “panuntut kamu ilmu daing ha pagbugsak niyu pa sikān sambil pa liyang lahad”. In hadis sin Rasul ini harus iban patut tumtumun bukun hadja sin utuk sagawa sambil pangatayan. Bang in pangatayan natu’ puti’ tantu na hadja in utuk puti’ da isab.
Malugay na in angan-angan namu’ magsulat sin suysuy sin jaman kiyalabayan namu ha kabuhi ini. Kiyadihilan kami waktu, amuna in timagna kami ha pitsa 29 November 2010 lisag 5:20 mahapun. Hambuuk sa makaluman magpahati bang unu in jimatuh ha waktu namu sibi-sibi pa sambil pa waktu ini, sagawa in suysuy ini muna-muna patumtum pa baran namu’ kandi. Magsukul da isab bang aun mabaya massa puas daing kāmu. In kasabunnalan sin kasigpitan di hikapagsuysuy bang amun in kasipugan hadja in taliun.
Hisulat namu ini hasupaya mahinang padduman sin sumunud kāmu, duun naka in makadihil mumpaat iban sin di’, in mahalga hikapahati ha anak-apu’ bang unu in jimatuh ha kabuhi namu nakauna iban sin nakahuli. Sila na in mag-atas takin kumawa pangadjian, bang saupama aun makawa’.
Hisulat namu’ hadja bang unu in kiyatumtuman namu. Bang unu in kiyaukkil ha pangatayan amuna in hikasuysuy halaum ini. In suysuy halaum ini taritib daing ha masa namu’ nakapanumtum puas piyagbata’, lamud na in katan kiyalabayan. Lapay ra isab in maksud sin kalimayahan sin bangsa magpaintul sin hula’ iban agama ha wayi sasaw sin kawasa guwa’ iban dayu.
Tuput Tuhan da in nakahati sin katan jimatuh ha nakahuli iban nakauna daing ha kāmu. Wayiruun panghanglaan namu’ dugaing sin unu jumatuh bang bukun Tuhan Tunggal. Tuhan in nakaingat sin hikmah sin kasabunnalan bang gumuwa daing ha kaihilas sin pangatayan magtabarru pa karayawan sin katan bukun pa ginhawa baran.
Neldy
